أ ب ت مكياج ( الجزء الثاني )

(( أحد مواضيعي القديمه حبيت انقلها لمدونتي من حسابي Mo5maliah في منتدى إقلاع ))

السلام عليكم ورحمة الله وبركاته

هلا هلا 

كيفكم مع هالبرد الحلو ،،

واخيرا نزلت الجزء الثاني من موضوعي

ترى بقولكم من ألحين الموضوع طويل طوييل طوييييل 
يبغالكم تركيز وانتوا تقرونه 
وان شا الله تستفيدون منه 

واي استفسار عن أي جزء لا يردكم الا الكيبورد 

كيف تتعلميــن المـكـيــاج  ؟

اول خطوة للوحدة اللي حابة تكون متمكنة من المكياج
1- الممارســـة على الأشخـاص  .

زي ما نعرف المكياج زي أي هواية ثانية اذا وقفتي عن ممارستها راح تنسينها بسرعة 

فا يفضل انك كل فترة تطبقين على اختك او وحدة من قريباتك 

ولا تنسين وانتي تجربين انك تحاولين تطبقين اغلب رسمات العين ولا تخافين من الأشكال الجديدة 
لأن لكل عين رسمة تبرز جمالها 

وبعد ما تتمكني من رسمات العين حاولي تدمجين رسمتين مع بعض وشوفي ايش يطلع لك 
وانتبهي من المبالغة  .

واهديكم هالكلمات الحلوه :

• لا تقولي صعب .. فتعجز يدك
• و لا تقولي أنا بارعة لا أحتاج للممارسة .. فتفقدي موهبتك تدريجيآ 
• خبيرة تجميل لأكثر من 10 سنوات تقول .. لو لم امارس المكياج لمدة 3 أيام متواصلة , ألاحظ يدي صارت
ثقيلـة في اليوم الرابع  !!

2- ورق المـكـيـــاج :

على مستوى العالم .. ما يطلقون لوك جديد لأي شركة مكياج

إلا بعد أن يتم تصميمــه على الورق ” تشابتـر ” 

يباع في مكتبة جرير ورق خاص بتعلم المكياج 
واللي تبي تحفظه بالجهاز وتطبعه تتفضل من هنا

وتقدري ترسمين العيون والأنف والفم وتغييرين في شكل الوجه 

وترسمين بكل ورقة شكل للوجه
( الدائري – المربع – المثلث – البيضاوي )

علشان تقدرين تطبقين وتعرفين تسوين مكياج وتعرفي تسوي الاضاءة وتوزيع الكونسيلر بكل الوجيه .

ملاحظة :

اذا جيتي بتطبقين على الورق استخدمي البودرة ولا تستخدمين كريم الأساس 
او أي شي كريمي

واستخدمي بالتطبيق المكياج القديم ،،

طريقة الرسم على الورق :

كود:

http://www.youtube.com/watch?v=0qQCrKpPWm8&feature=player_embedded

• وتقدرين تروحي لماك وتشوفي اعمال الخبراء عندهم في التصميم على الورق

3- تكوني على إطلاع دائم باللوكات الجديده للمكياج 

لا ننسى ان المكياج زي أي موضة ثانية لها شكل جديد كل فترة

فلازم تكوني مطلعة دائمه على جديد المكياج وما تكوني بشكل واحد دايم 

//

بعد ما عرفنا اهم النقاط لتمرس الميك اب نجي الحين لطريقة تنظيف الفرش 

لأنها أهم وسيله لتطبيق الميك آب

//

تختلف الفرش من حيث الشكل والحجم على حسب الوظيفه الي تقوم بها

بشكل عام كل ما كبر حجم الفرشاة فهي للتوزيع سواء توزيع البلشر او الظل او البودرة 
وكل ماصغر الحجم فهي للرسم والتحديد

استخدامات الفراشي  :

- فرش لكريم الأساس
- فرش للكونسيلر ( خافي العيوب )
- فرش للباودر
- فرش لتحديد الوجه
- فرش للأضاءه
- فرش للحواجب
- فرش للشدو ( ظل العيون )
- فرش للأي لاينر ( الكحل السايل )
- فرش لأحمر الخدود 
- فرش للشفاه

يختلف شعرها بين الشعر الطبيعي والصناعي ( نايلون ) وكلٍ له إستخدامه 
راح نوضحه بالرد الجاي 

المهم من هالكلام 

مع إستخدام الفرش عدة مرات تبدى البكتيريا تمنو فيها وتكثر
وطبعا المتأثر الأول هو بشرتك 
وعلشان نتفادى هالشي لازم نحرص على تنظيف الفرش كل فترة

الطريقه الصحيحه لتنظيف فراشي الميك آب  :

الأشياء اللي راح نحتاجها بتنظيف الفرشاة :

- منظف الفراشي من ماك ، جودته كويسة ويطووول معك
أو منظف الفراشي من ميك اب فور ايفر .
- زيت زيتون من النوع الخفيف ( ما يسبب أي اضرار بإذن الله ) .
- شامبو جونسون للاطفال .
- مناديل المطبخ .
- إسفنج .

صورة عامة لأشياء اللي راح نحتاجها :

هذي الطريقه لفرش الشدو والفرش الناعمه مع الحرص انك ما تحطين منظف الفرش او الشامبو على الفرش
وهي بشكل عامودي او واقفة علشان ما توصل للخشب وتخرب الفرشاة

اول شي تحطين الفرشاه على المنديل وتجيبي منظف الفراشي من ماك وتحطين كمية قليله على الفرشاة

وتبدين تحركين الفرشاه على المنديل من دون ما تضغطي كثير 
الين ما تلاحظين ان اللون اختفى وما صار يطلع من الفرشاهـ

تجيبي منظف ماك وتحطي كميه بسيطه على المنديل
وتبدا تمشي يمين يسار من دون ما تضغطي ، نفس الطريقة نكررها

هذي الطريقه للفرش القاسيه زي حقت الشفاه والآي لاينر

هذي فرشاه شفايف

نبتدي نحط كم نقطة من زيت الزيتون على المنديل ونبتدي نحرك عليه الفراشاة علشان يشيل 

طبقة الشمع اللي عليه المتبقية من الأرواج 
وفرشاه الآي لاينر نفس الطريقه بس بحركه دائريه خفيفه

تجيبي السفنجه و تكون جديده وتبلليها بمويه وتحطي شويه شامبو جونسن وتفرديه بااصابعك

و تجيبي فرشاة الظل وتبدين تحركينها على الإسفنجة يمين ويسار 
بعدين مرريها تحت المويه

ونفس الطريقة لباقي الفراشي 

ونفس الطريقة تتكرر
تاكدي ان المويه ماتجي عالاطراف التحتيه عشان ما تخرب قاعدة الشعر وتبتدي تطيح الشعرات 
بحركه دائريه مرريها تحت المويه 
بعدين بللي الاسفنجه بالمويه والشامبو وحركي بشكل دائري مع ضغط بسيط
بعدها حطيها تحت المويه وحركيها يمين ويسار علشان تروح كل الاشيا الباقية من الشامبو
خلي راس الفرشه الى الاسفل واسحبي الشعيرات مع الضغط الاسفل

بعد كذا جيبي فوطة وافرديها وحطي الفراشي عشان تنشف 
و اهم خطوه جيبي الاستشوار ونشفي الفرشه 
ضروري تنشفينها ، لانها إذا بقا فيها ماي بتتكون بكتيريا وعفونه ممكن ماتحسينها او تشوفينها لكن بتسببلك حساسيه أو فطريات أنت بغنى عنها  .

الفيديو باليوتيوب :

http://www.youtube.com/watch?v=UB_ZSy3Tt4o

ألحين نجي للتفصيل الممل لعدة المكياج  :

ان شا الله يكون الشرح واضح 

نبتدي بأفضل الماركات: ( لا تعبر عن رأيي الخاص )

1- ميك اب فور ايفر بالذات فراشي النايلون .
2- فراشي بوبي براون أكثر من رائعه .
3- فرش سقما ممتازة .
4- فراشي شواميرا ممتازه .
5- فرش ELF ، خاصة استديوا .
6- فراشي الماركات تبع الماكياج ، ممتازه بس عيبها محدوده يعني فراشي للاستخدام الشخصي مو البروفيشينال ، وأروعهم لانكوم .
7- لفراشي ماك جيده بس خشنه شوي .
8- فراشي سماش بوكس ممتازه أيضا . ومجموعتهم صغيره .
9- فراشي ماكياجي وسيفورا عاديه جدا .

ليش نشتري فرش المكياج مع أسعارها الغالية  :

1- الفراشي اذا اهتميتي فيها راح تعيش معك فترة طويلة ،
فا بدال ما تشترين كل شوي فراشي رخيصة تخرب عليك وتصير خشنة
على بشرتك ، اشتري الغالية واللي سعرها فيها ولك وللزمن .

2- نوعية الفرشاة لها دور كبير بالسعر وكمية الشعر ، والمسكة إذا خشب او ستانستيل ،، إلخ .

3- علشان تشوفين النتيجة اللي انتي تبينها بالميك اب اللي تستخدمينه عن طريق الفرشاة الممتازة ، وتسهل
توزيعك للظل او الباودر او البلاشر بدون ما تستخدمي أكثر من حاجتك .

كيف تعرفين ان الفرشاة اللي تبين تشترينها تستاهل المبلغ اللي بتدفعينه  :

1- اول شي طول المسكه ، ترتاحين لها قصيره أو طويله ، شوفي اللي يريحك
بالرسم واختاري على اساسه .

2- مرري شعر الفرشه على بشرتك ، إذا حسيتي انها خشنه  على بشرتك لا تشترينها  .

3- اختبري تماسك الشعر ،و حاولي تفركينها شويه وتسحبينها بخفة وإذا طاح شعرها ، يعني هالفرشة ما تسوى .

4- شوفي نوعية الشعر طبيعي او صناعي ، وترى مو لازم كل
الفراشي اللي تشترينها شعرها طبيعية ، يفضل لإستخدام الاشياء الكريمية فرشاة

شعراتها من النايلون  ليسهل غسلها وللتوزيع الشعر الطبيعي .

الحين نجي للفراشي اللي ما نقدر نستغني عنها  :

1- فرشه او ثنتين للظل ، متفاوتة الأحجام .
2- فرشة البلاشر .
3- فرشاة الأي لاينر .

أما الباقي ممكن تستخدمين العده اللي تجي

مع المنتجات  ، او تستخدمين أصبعك .

//

أساسيات اختيار الفراشي 

( تقدرين تستفيدين بهالمعلومات لأي فرشاة من أي ماركة وتعرفين

كل شكل لأيش وظيفته من دون ما تناظرين لرقم الفرشاة )

فيه نوعين من شعر الفراشي

اللي هم :

1- النايلون :

يستخدم للماكياج المائي او الكريمي ، اي شي فيه كريم او جيل نستخدم معه فرشة نايلون . وتلقونه بكل الماركات تقريبا بس بماركة فور ايفر محددين لها خط خاص ومسمينها فرش N .

ميزة هالنوع انه مايترك خطوط بعد المد ، لذلك إذا استخدمتيه مع الظلال البودره ماراح ينفع لانه مابياخذلك اللون .

أشكالها :

فرشة الاساس تكون سميكه وعريضة نسبيا عشان تقدرين تمدين الاساس ، وفرشة الظلال الكريمي تكون صغيرة وعريضة وقاسية شوي بس ناعمة وفرشاة الشفايف اصغر حجم للفراشي وفرشاة الكحل السائل تكون بشكل مائل راح تشوفونها بالرد الجاي .

2- الشعر الطبيعي :

فيه نوعين الخشن والناعم ، الناعم لتوزيع البلاشر والظل ، والخشن ياخذ لون أكثر من الناعم .

طبعا نوعية الشكل وقصة الفرشاة لها تأثير كبير في إستخدام الفرشاة وادائها ، مثلآ :

- الفرشاة اللي تكون مسطحة مافيها تدرجات تستخدم لتوزيع اللون الأساسي للظل .

- الفرشاه الللي قصتها مائله وسميكه تاخذ لون اكثر وتستخدمينها لرسمة الحدود الخارجية للعين بالظل .

- الفرشاه اللي يجي شعرها غزير وبمستوى واحد

بالغالب للدمج في مساحات كبيره .

- والفرشاة اللي تكون مستواها زي الخط المستقيم لرسم الظل اسفل العين او الكحل الكريمي .

وعلى فكره الفراشي لها اكثر من استخدام ، وحسب الرسمه اللي ببالك تقدرين تستخدمين الفرشاه بالطريقه اللي تناسبك ، بس هذي قواعد أساسيه تدلك على استخدام الفراشي .

 

وجزء الفراشي راح تلقونه هنا

ودي اذكر لكم كم  نصيحة خاصة للمكياج :

• اشتري المستحضرات اللي لها أكثر من إستخدام ، مثل المستحضرات

اللي نقدر نستخدمها لـ الشفايف والخدود مع بعض.

• إشتري الفاونديشن في النهار وجربيه على وجهك بـ نور الشمس الطبيعي .

• أي مستحضر مكتوب عليه dermatologist tested أو مختبر من قبل أطباء الجلد ، لا تحسبين

ان هـالمستحضرات بالضرورة صدق تم اختبارها من قبل أطباء ووافقوا عليها ،
لأن هـالعبارة تعني ان المستحضر تم اختباره ( بغض النظر عن نتائج الاختبار !! ) 

• eyelash curler care (عاقصة الرموش) تحتاجين تنظفين اللبادة اللي جوا اللي

تحمي الرموش لما تلفينهم ، واحيانا يجي معها غيارات للبادة ، احتفظي فيها وغيريها كل فترة .

• علشان تعرفين اللون اللي يصلح لك من البلاشر اقرصي خدودك وشوفي

بالمرايا اقرب لون لتورد خدودك الطبيعي . 

//

أنواع البلاشر ( الأحمر خدود  ):

1- الباودر :
اسهل تركيبة وسهل دمجها ومناسبة لكل البشرات .

2- جيل :
يعطي لون خفيف وصعب دمجه ويبيله بشره صافيه .

3- الكريمي :
يعطي منظر طبيعي و أكثر شي يناسب البشرات الجافة .

4- CHUBBY PENCILS

سهل الحمل والتنقل وسهلة الدمج ويناسب البشرات الجافة الى العادية .

5- POT ROUGE

يعطي لون سهل الدمج ، يناسب البشرات العادية والجافة ، غالبا يكون مثل الكريم بعلبه صغيرة ، وممكن نستخدمه لـ الشفايف ولـ الخدود .

//

نجي للأرواج وتركيبتها :

matte

الروج المطفي ، لونه مركز ويبقى لـ مدة أطول ، بس ان ترطيبه قليل

واللي شفايفها جافة ترطب شفايفها وتقشرها وترجع ترطبها بكمية كبيرة قبل

لا تستخدم هالروج لأنه راح ينشف شفايفها .

semimatte
أكثر ترطيب من المات ، لكن اقل ثبات !

sheer colors
شفافة سهلة الإستخدام .

stains

تبقى لوقت طويل لأنها تصبغ الطبقة الخارجية من الشفايف .

tints
مثل القلوس ، تحمي الشفايف وترطبهم ، وغالبا فيها حماية من الشمس .

balms لا يستغنى عنه 
مرطب وفيه لون خقيق

gloss sticks
تغطية شفافة وتشبه الشير والقلوس .

lip glosse 
ترطب ، تحمي من الشمس ، تعطي مظهر ممتلئ للشفايف ولمعة .

chubby lips pencils 
ممكن نستخدمها لـ تحديد الشفايف ، ولأنها كريميه نستخدمها كـ روج بعد ! 
تبقى لـ فترة طويلة لكنها تنشف الشفايف .

lip liners
المحددات ، نستخدهم كـ محدد ، ونقدر نستخدم كـ طبقة على كامل الشفايف

قبل ما نحط الروج عشان يبقى معانا اللون فترة اطول

//

اممممم في شي ما تكلمنا عنه صح

أكيد مكياج العين  ومستحضراته :

الظل الكريمي 
Cream Eye shadow

ايش الشي المميز بالشدو الكريمي  ؟

اولا ملمسة ناعم كريمي سلس بالإستخدام اممم يعني تقدرين تقولين انو جد جد شي روووعة 
وأعتقد ان محبتي للظل الكريمي ناتج عن انو يعطي لوك حيوي ومنظر منعش للعين وله تأثيرات على شكل العين حلووه وغير كذا يرطب الجفون .

طبعا هو ينباع بأشكال كثييره وعلب بأشكال وألوان .

والسبب الأكبر لإستخدام الظل الكريمي انو ما يترك حوسة كثيرة  وأثار أسفل العين مثل الظل الباودر .

هل الظل الكريمي يجعل جفن العين مجعد او يخليه بهالشكل  ؟

اكيد بعض الأنواع يسبب هالمشكلة 
طبعا الأنواع الرخيصة اغلبها تسبب هالمشكلة ، بس في أشيا كثير تسوينها علشان تتفادين هالمشكلة

وأهم شي تاكدي من وضع البيس على الجفن أولآ .
هذا راح يمنع من ان يصير تجعيدات على العين والأفضل 
ما تكثر من الظل الكريمي .

طرق إستخدام ظل العيون الكريمي :

تستخدمين الظل الكريمي لتثبيت ظل العيون المضغوط او الباودر والبيقمنت ليبان بشكل أحلى و يثبت لفترة طوويلة 
وخاصة اذا بغيتي تعملي سموكي يعطي عمق أكثر للون .

وطبعا تقدرين تستخدمينه كبيس للعين .

طرق توزيع الظلال الكريمي :

- الطريقة المشهورة اكثر شي هي إستخدام الإصبع بتوزيع الظل الكريمي .

- إستخدام الفرشاة اللي يكون شعراتها من النايلون ليسهل غسلها ويفضل إستخدامها مع الظلال الكريمي 
والكونسيلر ( خافي العيوب )

كيف تقدرين تلقين أفضل ظل عيون كريمي ؟

لمى تروحين تدورين أفضل ظل عيون كريمي حطي في بالك ان يكون كمية اللمعة كبيرة فيه ليعطي أفضل نتيجة 
وبهالطريقة ما تضطرين تستخدمين كمية كبيرة من الظل لن اللون اصلا قوي .
وعلشان تحافظين على الظل الكريمي اطول فترة ممكنة ، اغلقية بشكل ممتاز 
بعد كل إستخدام علشان ما يجف ويخرب .

ايش فايدة الآي لاينر ؟

إستخدام الاي لاينر هي أفضل وسيلة لإبراز جمال العين وتعطيهم عمق جميل 
هو بالأصل موجود فيك .

طرق استخدام الآي لاينر:

طبعا كلنا عارفين ان في طرق كثييرة لرسمة الآي لاينر وستايلات .

• من الطرق للآي لاينر انك تحطي خط رفيع فوق الجفن يطلعك بشكل ناعم 
وينفع لدوام الصبح .

• طريقة الكات آي  :

cat eye

http://www.youtube.com/watch?v=seQweeWvKFw

• طريقة رسمة العين المجنحة  :

Winged Eyeliner

http://www.youtube.com/watch?v=_oI0Bwai83k

بعض النصائح لرسمة العين  :

- بدال ما تعملين خط على جفنك تروحين تملين الفراغات بين رموشك راح يعطي عمق جميل للعين .

- ومافي احلى من انك تختاري لون ظل طبيعي وقريب لبشرتك مع خط خفيف من الكحل السايل .

- وللي عيونهم قريبة من بعض انصحكم انكم تحطوا كحله من برى ومن تحت بالجهة الخارجية للعين .

- وللي عيونهم بعاد عن بعض ارسمي كحلة من الجهة الداخلية للعين فوق وتحت علشان تبان انهم قراب .

- للعيون الصغيره ، اذا كانت عيونك من الجنبين اصغر استخدمي الكحل الأبيض او أي لون فاتح من داخل العين لتكبيرهم واستخدمي الكحل السايل من الجوانب فوق الجفة واسفل العين .

- حاولي لما تحطين الكحله ما تشدين عينك كثير لأنها تسببك ظهور التجاعيد ابكر من وقتها .

- وللي بدت تطلع حول عيونها تجاعيد حاولي العناية بعينيك أكثر من قبل واستخدمي كريمات للعين فيها نسبة عالية من الكولاجين .

- بيس لظلال العيون فايدته يعطيك نتيجة أفضل لللون اللي تبينه .

- الظل الكريمي يخلي جفونك رطبة ويعطيك شكل حيوي وجميل وناعم .

ماهو البيس لظلال العيون ؟

هو كريم تضعينه قبل ما تحطين أي شي على عينك 
وهو مهم جدا لعدة أسباب .

1- يثبت لك ظل العيون والباودر .
2- وراح يخفي الكثير من التجاعيد اللي تطلع على الجفن .

ملاحظة :
اكثر ناس تطلع بأجفانهم التجاعيد البشرة الدهنية .

3- راح يوفر عليك فلوسك لأنه راح يثبت لك الظل لفترة طويلة بدال ما تحطينه بكميات كبيرة 
او تكررين عليه .

//

مسميات راح تواجهك بعمل مكياج العين :

عظمة الحاجب :

وهو المكان اللي يكون اسفل الحاجب على طول ، وهو المكان اللي نحط فيه الظل اللمعة ( فضي ، ذهبي ، أبيض )

الجفن :

وهو اللي يكون على العين وبتكون رسمة الظل عليه .

الزاوية للعين:

هي اللي تكون فوق الجفن وتحت عظمة الحاجب وتكون بهالشكل “>” او العكس .

منطقة مدمع العين :

وهي المنطقة اللي تكون عند زاوي العين من الداخل الأقرب للأنف .

خط الرموش :

وهو الخط اعلى الرموش مكان وضع الكحل السائل .

//

طريقة إستخدام ظلال العيون ؟

1- نبتدي بأختيار اللون الوسط ونضعه على الجفن ونمده لحدود العين الخارجية بإستخدام فرشاة الظل وانتبهي لا تطلعي خارج حدود العين .

2- الحين تختارين لون اغمق من اللون اللي اخترتيه كأساس للعين وتبتدي بإستخدام الفرشاة المايلة لرسم حدود خارجية للعين .

3- بعدها تاخذي لون فاتح بلمعه ونحطه على عظمة الحاجب ومنطقة مدمع العين لتسليط الضوء عليهم .

4- والحين وصلنا لأهم خطوة واللي هي دمج الألوان ونستخدم فرشاة الدمج .

//

الحمدلله انتهيت من موضوعي اللي تعبت عليه كثييير  طبعا هذي دروس جمعتها واعدت صياغتها وترجمتها  من المدونات الأجنبية و من عدة منتديات  والصور من بحثي بالعم قوقل  ولا ننسى اليوتيوب   واشكر كل شخص ساهم بنشر هالمعلومات المفيدة  ~ اتمنى انكم إستفدتوا وأستمتعتم معي بالهالموضوع  اللي انا أحببه كثير  ، وأسفة على تأخيري بإنزاله

وأكييييييد انتظروني بالجــزء الثالث اللي كله ونااااااسة  صحيح هو جاهز بس هالموضوع طوويل فا حبيت انزل الجزء الباقي لحاله  ،،  علشان ياخذ حقه  ،، ولا أسمح بالنقل الا بذكر المصدر  واللي يستفيد من الموضوع تكفيني دعوة بإن يرزقني الله وكل مسلمة الذرية الصالحة وحسن الخاتمة والتوفيق بحياتي  ~ سبحانك اللهم وبحمدك , اشهد ان لا اله الا انت , استغفرك واتوب اليك