تجربتي الشرائية من موقع lens.me

السلام عليكم ورحمة الله وبركاته 

لي فترة ما نزلت شي عالمدونة بسبب انتقالي لمنطقه جديده

لي 3 شهور تقريبا أنتقلت الى الشرقيه 

وأبتعدت عن الانستقرام والمدونة

فا حبيت ابتدي بالمدونة 

وأشاركم تجربتي بالطلب من موقع العدسات 

قبل فتره كنت أبحث عن موقع سريع الشحن

للعدسات ويوفر عدسات سولتيكا و أنستازيا الامريكية

بحثت كثير أغلب شي القى حسابات بالانستقرام 

الصراحه ما أحب اطلب عن طريق الأنستقرام

يعني ما احس له داعي

أعرف طريقه الطلب من اي موقع 

فما حبيت هالشي

فضلت اعتمد على نفسي بكل الطلب

بس الشي اللي مخوفني خاصه اذا جيت اطلب عدسات صعوبه اني القى الموقع الثقه

اللي يوفر لي العدسات الأصليه

خاصه عيوني حساسه جدا فما أبي اجازف فيها أبدآ

لقيت هالموقع https://www.lens.me

مقره في الأمارات 

يوفر ماركات كثيره 

ومنها سولتيكا وانستازيا 

لقيت مدح كثير على انستازيا 

فا حبيت أجربها هالمره 

طلبت عدسه وحده كتجربة

يشحن الموقع مجاني لأي طلب أكثر من 60$

طبعا تقدرين تختارين العمله اللي تبينها من الموقع وتطلع لك الأسعار بالريال السعودي

او أي عمله تختارينها 

لما جيت أطلب لقيت متوفر عندهم خاصية الدفع عند الإستلام 

فا إخترتها 

والشحن ما كان واضح اي شركه 

بس كنت متأكده انو بيكون عن طريق ارامكس

بعد يوم من الطلب أتصلوا علي لتأكيد الطلب والعنوان

بعدها ب 4 أيام جتني رساله من ارامكس ان الطلب وصل 

طبعا يرسلون ايميل مع كل خطوه تصير لين اخر شي يرسلون لك رقم التتبع 

بعد ما ارسلوا لي الرساله رحت استلم الشحنه 

وكانت مغلفه ببلاستيك ارامكس 

وداخله صندوق بهالشكل 

اذا فتحتي الصندوق راح تلقين 

ظرف فيه الفاتورة و رساله شكر وظرف فيه طلبك 

حبيت الأهتمام بالتغليف 

مره جميل ومرتب 

موجود في ظرف الطلب مع علبه ماركة بيلا لمحلول العدسات ما قد جربته

وعدساتي 

وحبة اوريو ههههه انصدمت لما شفتها 

شي كيوت 

هذا شكل محلول العدسات 

لسه ما جربت عدسات انستازيا اذا جربتها راح ارجع اعدل هنا وأكتب تجربتي 

تجربتي بعد ما أستخدمت العدسات أكثر من 5 مرات ولمدة طويله : 
(( العدسه جميلة باللبس ومريحة جدا انا عيوني حساسه جدا وجافه 
مرة أرتحت فيها ، بس عدسات سولتيكا اريح منها بالنسبه لي
راح اعتمد باذن الله هالماركتين لي لأن هم الوحيدات اللى الى الأن 
تقبلتهم عيني بعد الجفاف والحساسيه اللي صارت بعيوني ))

//

تجربه شرائية جميلة 

راح أكررها إن شا الله

الجميل إننا نلقى مواقع عربيه وقريبه تفور هالمميزات 

- توصيل مجاني

- دفع عند الأستلام 

- تنوع في الماركات المعروضه 

أهنيهم على هالموقع الجميل 

//

ان شا الله أكون افدتكم بهالتدوينه